يتواجد التوكتوك بكثافة داخل مدينة فاقوس بالشرقيه كوسيله لكسب الرزق فى ظل البطاله المنتشره بين الشباب ، وتعتبر فاقوس من أول المدن التى ظهر فيها التوكتوك بالمحافظه، ولكنه يتسبب في العيد من المشاكل المرورية ، مع انتشار عمليات النصب والسرقه من بعض سائقى التكاتك .

 يوجد بالمدينه أكثر من 20 ألف توكتوك غير مرخص مما يسهل من عمليات السرقه التى يقوم بها بعض السائقين فى اختطاف الحقائب من السيدات واستغلال الركاب فى رفع تسعيرة الأجره بالبلطجه.

يقول معاذ المجلى وهو أحد منسقى حمله شبابيه لتنظيف مدينة فاقوس : “ذهبت أنا ومجموعه من الشباب للمحافظ وعرضنا عليه مجموعة حلول للمشاكل منها التوكتوك وطالبنا بترخيص التكاتك وحدة محلية مش مرور عشان كل توكتوك ياخد رقم وياخد لون خاص بالوحدة المحلية ، لأن حالات السرقة والبلطجة والخطف زادت بشكل كبير جدًا , وأهل البلد من حقهم يعيشو مرتاحين في أمان ودي أقل حقوقنا في المعيشة .

وأضاف :ده غير ان سعر الأجرة بيزيد بشكل مستفز لأهل البلد أقل أجرة بـ 5 جنيه الى 10 جنيه , مع إن التوكتوك بياخد 7 لتر بنزين و 2 احتياطي ودة يشغله لمدة 12 ساعه متواصله ،و كتبت شكوى عليها 1000توقيع وسلمتها للواء سامي سيدهم بالمحافظه ولم يتم اتخاذ أي اجراء قانونى ضد التكاتك .

ويضيف محمد بكر: “مفيش رقابة هنخلص من التكاتك دى ازاى لما المرور ومجلس المدينة نايمين فى العسل ومحدش بيسأل ، مين هيسأل.. الناس معدش ليها قيمة عند المسئولين يبقى يسألوا عننا ليه .

ويعلق عبد الله عطيه: “أرجو تجميع التاكاتك التى لاتحمل ترخيص من المرور وتزويد فاقوس بحملات مرورية عند المزلقان حتى يتثنى لنا السير بأمان وسط المخالفين .

ويختم السيد العرينى :”هذا هو العادى لمحافظة الشرقيه عشوائيه فى كل شئ وغياب تام لجميع أجهزة الدولة ومتعرفش تتعامل مع حد من غير واسطه وكله ماشى بالبركة”.